Það er vart til vinsælli hrekkur en sá að bregða fólki og hann klikkar sjaldan. Útskriftarnemendum St. Andrews framhaldsskólans í Delaware tókst heldur betur að bregða skólastýrunni, Joy McGrath.

Hópur nemenda laumaði sér inn í hús McGrath um miðja nótt, fann sér svefnstað á fyrstu hæð heimilisins og fór að hátta. Skólastýrunni brá ansi mikið þegar hún kom niður um morguninn klædd í baðslopp og Crocs-skó. Hrekkurinn náðist á myndband og hefur glatt marga á bæði Instagram og TikTok og er með vel yfir 30 milljónir áhorfa. 

„Góðan daginn, litlu kanínur“

Í fyrstu verður McGrath svo um að hún lokar hurðinni og hörfar en heyrir brátt hláturinn í nemendunum og kíkir því fram, brosir og segir: „Góðan daginn, litlu kanínur. Þið eruð öll í hinum heimsins mestu vandræðum.“

Skólastýrunni brá enn frekar þegar hún komst að því að útskriftarhópurinn var búinn að vera í húsinu í heilar fimm klukkustundir en það besta við hrekkinn er hversu vel McGrath tók í hugmynd nemenda sinna. „Þetta hlýtur að vera fegursta sjón sem ég hef séð,“ endar hún á að segja við hópinn. 

Ánægja í athugasemdakerfinu

Netverjar eru heldur betur ánægðir með hrekkinn en jákvæð viðbrögð McGrath hafa vakið hvað mesta athygli. „Svona veistu að kennari hafði jákvæð áhrif á nemendur sína. Ég elska þetta,“ sagði einn á Instagram. „Þetta er sá kennari sem þau munu öll tala um eftir 40 ár. Skál fyrir henni!“ sagði annar. 

Hins vegar voru ekki alveg allir svona jákvæðir með uppátækið: „Þau eru bókstaflega að brjótast inn, það er hrekkur, það er glæpur,“ skrifaði netverji sem sá ekki húmorinn í hrekknum. Nemendurinn gerðust þó ekki sekir um innbrot þar sem eiginmaður skólastýrunnar er sagður hafa átt þátt í því að skipuleggja hrekkinn. 

Tengdar fréttir

Instagram

Rakel María og Guðmundur ástfangin í Kólumbíu

• Ástin blómstrar hjá Freyju og David
• Sláandi lík föður sínum
• Katrín Edda og Markus fagna 3 ára brúðkaupsafmæli
• Instagram: Töff í tauinu og topplausir

» Fleiri tengdar fréttir

• Blogga um frétt