Slegin í andlitið uppi á sviði

Söngkonan Ava Max var slegin í andlitið á tónleikum sínum í Los Angeles. Einn tónleikagestanna komst upp á sviðið og sló hana í andlitið á meðan hún flutti lag sitt The Motto. 

Myndband sem náðist af atvikinu er nú í dreifingu á samfélagsmiðlum og má þar sjá karlmann slá Max í framan. Max hélt þó ótrauð áfram og kláraði flutninginn á laginu. Eftir tónleikana sagði hún frá því á Twitter-reikningi sínum að maðurinn hefði slegið hana svo fast að hún fékk rispu á augað.

Einn tónleikagestanna segist á Twitter-reikningi sínum hafa séð öryggisvörð hlaupa að manninum og henda honum niður stiga af sviðinu. Samkvæmt heimildum TMZ var árásarmaðurinn ekki handtekinn.

Max er ekki eina söngkonan sem hefur orðið fyrir ofbeldi á tónleikum sínum nýlega. Fyrr í vikunni voru sagðar fréttir af því að söngkonan Bebe Rexha hefði fengið síma í andlitið á miðjum tónleikum sínum. 

Frétt af mbl.is

Með glóðarauga og skurð eftir högg frá aðdáanda

• Blogga um frétt