Söngkonan Jennifer Lopez fagnar nú pappírsbrúðkaupi sínu með leikaranum Ben Affleck. Ásamt því að deila myndum af sér á Instagram-reikningi sínum til að minnast brúðkaupsins, setti hún stiklu af nýjasta laginu sínu, Midnight trip to Vegas, í fréttabréfi sínu sem er aðgengilegt aðdáendum hennar á netinu.
Lagið er það fyrsta sem kemur út á komandi plötu hennar sem ber heitið This is Me...Now og er tileinkað eiginmanninum. Er platan í raun framhald af plötunni This is Me...Then, sem kom út árið 2002 og var einnig tileinkuð Affleck og brúðkaupi þeirra sem aldrei varð af. Lopez og Affleck áttu eftir að hætta saman í millitíðinni og náðu ekki aftur saman fyrr en árið 2021. Parið gifti sig svo í fyrra, tuttugu árum eftir að þau ætluðu upprunalega að gifta sig.