Charlene prinsessa og Albert fursti af Mónakó gerðu sér glaðan dag á árlegu galakvöldi hjá Rauða krossinum í Monte Carlo. Með þeim í för var frænka Alberts, Camille Gottlieb, en hún er dóttir Stephanie prinsessu, systur Alberts.
Lítið hafði sést til Charlene prinsessu í sumar og voru fjölmiðlar þar ytra farnir að velta fyrir sér ástæðu fjarveru hennar.
Þá hafa margir veitt því eftirtekt að hún hefur ekki sett neitt inn á samfélagsmiðla í langan tíma eða í um það bil átta mánuði. En prinsessan er vön að setja inn færslur á Instagram til þess að fagna ýmsum skemmtilegum tímamótum fjölskyldunnar eða kynna málefni sem henni eru hugleikin. Í fyrra setti hún inn til að mynda mynd af sér og Alberti til þess að fagna brúðkaupsafmæli þeirra. Það gerði hún ekki í ár og vakti það athygli enda alltaf hávær orðrómur um yfirvofandi skilnað.