Fyrrverandi Disney-stjarna ákærð fyrir glannaakstur

Fyrrverandi Disney-stjarnan Ashley Tisdale hefur verið ákærð fyrir glannaakstur í tengslum við umferðarslys sem átti sér stað á Hollywood Boulevard í Los Angeles á síðasta ári.

TMZ hefur eftir Michael R. Parker, lögmanni ákæranda, að Tisdale sé grunuð um gáleysislegan akstur þegar hún snögglega skipti um akrein og olli í kjölfarið árekstri. Lögmaðurinn heldur því einnig fram að leikkonan hafi verið með „mikil læti” og byrjað að kalla ákærandann Linu Gonzales „öllum illum nöfnum“.

Sjálf segist Gonzales hafa hlotið háls- og bakmeiðsli í kjölfar árekstursins sem hafi valdið henni tekjutapi og miklum lækniskostnaði, eða um 19 milljónum íslenskra króna. Gonzales fer fram á skaðabætur.

Ekki hefur náðst í fulltrúa leikkonunnar, en réttarhöld yfir Tisdale eru áætluð í febrúar 2025.

• Blogga um frétt