Volaða Land framlag Íslands til Óskarsverðlaunanna

Kvik­mynd­in Volaða Land verður fram­lag Íslands til Óskar­sverðlaunna 2024. Mynd­in var val­in af dóm­nefnd Íslensku kvik­mynda- og sjón­varps­aka­demí­unn­ar, en í henni í sátu full­trú­ar helstu fag­fé­laga ís­lenska kvik­myndaiðnaðar­ins, auk full­trúa kvik­mynda­húsa, gagn­rýn­enda og Kvik­mynda­miðstöðvar Íslands.

Óskarsverðlaunahátíðin fer fram í 96. sinn sunnudaginn 10. mars á næsta ári. Tilnefningar til verðlaunanna verða kynntar þriðjudaginn 23. janúar 2024.

Kvikmynd sem ögrar áhorfendum 

„Volaða Land er margslungið heilsteypt kvikmyndaverk sem ögrar áhorfandanum með því að spyrja sammannlegra spurninga um tilvist og tilgang mannsins á hugrakkan og áleitin hátt.

Myndin segir frá ungum dönskum presti, Lucas, sem heldur til Íslands undir lok 19. aldar í þeim tilgangi að reisa kirkju og ljósmynda íbúa eyjunnar. Óvægin náttúruöflin hafa snemma áhrif á ferðalagið og samskipti nýlenduherrans við íslenska sveitamanninn Ragnar ganga ekki sem skyldi vegna tungumálaerfiðleika og menningarmunar. Á ferðalaginu og í leit sinni að æðri mætti þarf presturinn að kljást við sjálfan sig andspænis náttúrunni. Löngun hans til yfirráða gagnvart henni verður honum að falli.

Kvikmyndataka Mariu Von Hausswolff er stórbrotin og er hver rammi eins og listaverk. Náttúra Íslands í gegnum linsu hennar er í senn óvægin, framandi, ógnvekjandi, fráhrindandi og blaut en líka ægifögur og heillandi án þess að verða nokkurn tímann væmin eða yfirdrifin.

Þrátt fyrir að viðfangsefni myndarinnar og efnistök séu alvarleg og drungaleg er myndin oft og tíðum mjög fyndin og sett fram af einstakri næmni og dýpt,“ segir í umsókn dómnefndar. 

Frétt af mbl.is

Kvikmyndin Volaða land „var bara dauð“

Aðstandendur myndarinnar á kvikmyndahátíðinni í Cannes. AFP/Valery HACHE

Volaða Land er skrifuð og leikstýrð af Hlyni Pálmasyni. Með aðalhlutverk fara þau Elliott Crosset Hove, Ingvar Sigurðsson, Vic Carmen Sonne, Ída Mekkín Hlynsdóttir, Jacob Hauberg Lohmann, og Hilmar Guðjónsson.

Hlotið fjölda viðurkenninga

Frá frumsýningu myndarinnar á Cannes kvikmyndahátíðinni 2022 hefur hún safnað fjölda verðlauna og tilnefninga á mörgum virtustu alþjóðlegu kvikmyndahátíðunum, auk þess sem hún hefur verið tilnefnd til Kvikmyndaverðlauna Norðurlandaráðs og Evrópsku Kvikmyndaverðlauna.

Frumsýning myndarinnar í íslenskum kvikmyndahúsum var þann 10. mars 2023 og hlaut myndin tvenn verðlaun á Edduverðlaunahátíðinni í sama mánuði. Hlynur hlaut Edduverðlaun fyrir leikstjórn ársins og Maria von Hausswolff fyrir kvikmyndatöku.

Stilla úr kvikmyndinni Volaða Land.

• Blogga um frétt