Veröld/Fólk | mbl | 4.10.2023 | 9:48 | Uppfært 13:14

Opnar sig um meint framhjáhald Beckhams í fyrsta sinn

David Beckham og Victoria Beckham hafa gengið í gegnum ýmislegt á þeim 24 árum sem þau hafa verið gift. AFP

Victoria Beckham hefur nú opnað sig í fyrsta sinn um meint framhjáhald eiginmanns hennar, Davids Beckhams, árið 2003 á Spáni.

Í nýrri heimildarmynd á Netflix, Beckham, tjáir hún sig í fyrsta sinn um meinta framhjáhaldið. „Ég hef aldrei verið jafn óhamingjusöm á ævinni og þarna,“ sagði Victoria, en samkvæmt Sun upplifði hún mikla reiði í kjölfar ásakananna. Hún segist þó hafa haldið reiðinni innra með sér til að styðja við fótboltaferil eiginmanns síns.

Hvort í sínu landinu þegar ásakanirnar komu upp

Árið 2003 flutti David til Spánar til að spila með knattspyrnuliðinu Real Madrid á meðan Victoria var enn búsett í Bretlandi. Á þeim tíma stigu tvær konur fram, þær Rebecca Loos og Sarah Marbeck, og fullyrtu að þær hefðu átt í ástarsambandi við íþróttamanninn. Fljótlega eftir að sögusagnirnar fóru á kreik ákvað Victoria að flytja til Spánar.

„Þetta var erfiðasta tímabilið því okkur leið eins og heimurinn væri á móti okkur. Málið er að við vorum á móti hvort öðru ef ég á að vera algjörlega heiðarleg,“ rifjaði hún upp og líkti ástandinu við martröð sem hafi haft mikil áhrif á hjónaband þeirra.

Victoria og David eru með frægustu stjörnuhjónum heims, en þau kynntust árið 1997 og gengu í hjónaband árið 1999. Þau eiga fjögur börn saman, Brooklyn, Romeo, Cruz og Harper.