Ætlaði að nema á brott og myrða sjónvarpsstjörnu

Maður var handtekinn fyrir ásetning um mannrán og morð. Hann er sagður útfært nákvæma áætlun um hvernig mætti nema á brott bresku sjónvarpsstjörnuna Holly Willoughby. 

Í frétt BBC segir að maðurinn sem um ræðir heitir Gavin Plumb og er 36 ára öryggisvörður í verslunarkjarna.

Willoughby hefur ekki getað mætt til starfa í morgunsjónvarpsþættinum This Morning á ITV eins og hún er vön og hefur verið undir öryggisgæslu lögreglunnar á heimili sínu sem hún deilir með eiginmanni og þremur börnum.

Samkvæmt The Sun þá eru engin tengsl á milli Plumb og Willoughby. 

Lögreglan fann ýmis óhugnaleg skilaboð sem innihéldu hótanir um mannrán og alvarlegar árásir á hendur Willoughby. 

„Þetta var mjög hröð rannsókn og lögreglan vann dag og nótt við að afla gagna til þess að handtaka manninn,“ segir í yfirlýsingu lögreglu.

„Öryggi fólks skiptir mestu máli og við munum halda áfram að setja mál sem þessi í forgang.“

Honum er lýst sem einfara sem fer sjaldan út úr húsi. Þá hefur hann einnig glímt við þunglyndi og ofþyngd og tók meðal annars þátt í raunveruleikaþætti fyrir nokkrum árum sem gekk út á það að léttast.

• Blogga um frétt