Fyrrverandi knattspyrnumanninum Rúrik Gíslasyni er margt til listanna lagt, en á undanförnum vikum hefur hann slegið rækilega í gegn í sjónvarpsþáttunum IceGuys sem fjalla um samnefnt strákaband.

Rúrik á glæstan fótboltaferil að baki og hefur spilað í Englandi, Danmörku og Þýskalandi. Hann skaust eftirminnilega á stjörnuhimininn sumarið 2018 þegar hann fór á heimsmeistaramótið í knattspyrnu með íslenska landsliðinu. Eftir að Rúrik kom inn á í síðari hálfleik á móti Argentínu varð allt vitlaust og fóru fylgjendur hans á Instagram úr því að vera 30 þúsund yfir í 358 þúsund á örskömmum tíma.

Síðan þá hefur boltinn sannarlega rúllað hjá Rúrik, en í dag er hann fyrirsæta, áhrifavaldur, dansari, söngvari og leikari. Ferill Rúriks hófst þó á fótboltavellinum í Kópavogi þegar hann var 17 ára gamall.

Fór út í atvinnumennsku 17 ára

Ferill Rúriks hófst hjá HK í Kópavogi og spilaði hann með liðinu til ársins 2005, en þá fór hann út fyrir landsteinana og spilaði með Charlton Athletic í Lundúnum aðeins 17 ára gamall. 

Frá Lundúnum til Danmerkur

Frá Lundúnum lá leið Rúriks til Danmerkur árið 2007 þar sem hann spilaði með þremur mismunandi liðum á árunum 2007 til 2015. 

Fyrst fór hann til Viborg á Jótlandi, þaðan til OB í Óðinsvéum og að lokum til F.C. Kaupmannahafnar. 

Kláraði ferilinn í Þýskalandi

Árið 2015 fór Rúrik til Þýskalands þar sem hann spilaði með SV Sandhausen til ársins 2020 en þá tók hann ákvörðun að leggja fótboltaskóna á hilluna. 

Á ferlinum spilaði Rúrik 53 leiki með íslenska A-landsliðinu og skoraði í þeim þrjú mörk.