Söngvarinn Páll Óskar Hjálmtýsson greindi frá því á samfélagsmiðlum að hann væri búinn að opna glænýjan pítsastað, Pizza 107, ásamt Valgeiri Gunnlaugssyni, fyrrverandi eiganda Íslensku flatbökunnar.
Pizza 107 er staðsettur á horninu á Hagamel 67 þar sem bókabúðin Úlfarsfell var áður til húsa. Páll Óskar er fæddur og uppalinn í hverfi 107 og þekkir því svæðið eins og lófana á sér.
„Mér er ekki sama hvað verður um þetta horn og höfum við lagt mikla vinnu í að gera þetta „nice og cozy“. Við erum í 107 Reykjavík og í loftinu eru 107 ljósaperur og kúnnarnir geta dúllað sér við að telja ljósaperurnar á meðan þeir bíða eftir pizzunum,“ sagði söngvarinn í myndskeiði sem hann birti á Instagram í gær.
Heillaóskum hefur rignt yfir þá félaga eftir tilkynninguna og því greinilegt að það ríki spenna og eftirvænting fyrir pítsunum.