„Þetta er svo sannarlega ný áskorun“

Nemendur Listdansskóla Íslands stíga á svið Borgarleikhússins sunnudaginn 26. nóvember með uppfærslu af hinu klassíska jólaverki, Hnotubrjótnum, en það er jólasýning skólans í ár. Hnotubrjóturinn er einn vinsælasti ballett allra tíma og ómissandi hluti af jóladagskrá margra.

Óteljandi uppfærslur hafa verið gerðar af Hnotubrjótnum, klassískar og samtímalegar, en Elizabeth Greasley, skólastjóri Listdansskóla Íslands, segir nemendur, kennara og aðstandendur skólans hlakka til að flytja þeirra útgáfu af verkinu fyrir áhorfendur á sunnudag. 

Dilly Greasley, skólastjóri Listdansskóla Íslands mbl.is/Eggert Jóhannesson

Hin breska Elizabeth Greasley, kölluð Dilly, var ráðin skólastjóri Listdansskóla Íslands fyrr á þessu ári og hefur háleit markmið um að koma skólanum í hæsta gæðaflokk eftir erfið ár, en skólanum var bjargað frá gjaldþroti síðastliðið vor.

Elizabeth var atvinnuballerína um árabil, dansaði með English National Ballet og Cecilia Marta Dance, og miðlar nú reynslu sinni áleiðis til nemenda skólans ásamt því að vinna að eflingu hans.

Frétt af mbl.is

Elizabeth Greasley ráðin skólastjóri

Frétt af mbl.is

Rekstur tryggður út árið

Nálgast verkið á nýjan máta

„Við höfum unnið hörðum höndum að því að ná utan um þetta mikla verk og það hefur gengið vonum framar. Ég hef lagt sérstaka áherslu á fjölbreytni, fjölhæfni og sköpunarkraft á þessari önn og mun ballettinn sýna það,“ segir Elizabeth, en nemendur skólans munu dansa Hnotubrjótinn með nokkrum ólíkum dansstílum, það er klassískum ballett, djass- og nútímadansi. 

Hér má sjá nemendur Listdansskóla Íslands á æfingu. Ljósmynd/Aðsend

„Þetta er svo sannarlega ný áskorun, en við erum mjög spennt að sjá nemendur okkar takast á við Hnotubrjótinn á þennan nýjan máta,“ segir hún. 

Hnotubrjóturinn segir frá Drosselmeyer, sem er göldróttur úra- og dúkkusmiður. Frænda hans hefur verið breytt í hnotubrjót af Músadrottningunni. Til að losna úr álögunum, verður Hnotubrjóturinn að drepa Músakónginn og ung stúlka verður að verða ástfangin af honum.

Mikið líf og fjör hefur ríkt á æfingum. Ljósmynd/Aðsend

• Blogga um frétt