Gerði grín að handtökunni

Leikkonan og uppistandarinn, Tiffany Haddish, gerði góðlátlegt grín að eigin handtöku aðeins örfáum klukkustundum eftir að hún var handtekin grunuð um ölvunarakstur. Haddish hafði verið að skemmta á Laugh Factory í Los Angeles, en það er þekkt hefð hjá leikkonunni að koma fram á staðnum yfir þakkargjörðarhátíðina.

Haddish fékk spurningu úr sal eftir að fréttir bárust af handtökunni, en forvitinn áhorfandi vildi ólmur vita hvað hefði gerst. Leikkonan sagði þá: „Sko, ég var búin að biðja Guð um að senda mér mann með vinnu, góðan starfsferil og helst einhvern í einkennisbúning og hann svaraði bænum mínum,“ en þar átti Haddish við lögregluþjóninn. Áhorfendur náðu upptöku af svarinu sem fór fljótt í dreifingu á netheimum.

Á aðfaranótt föstudags barst lögreglu tilkynning um bíl á Beverly Drive sem lokaði fyrir umferð, en samkvæmt erlendum miðlum þá var leikkonan hálfsofandi á stýrinu en bíllinn í gangi. Haddish var grunuð um sama brot í Atlanta á síðasta ári.

• Blogga um frétt