Sjónvarps- og athafnakonan Oprah Winfrey hefur sjaldan litið unglegri út en á nýrri sjálfu sem hún birti á dögunum. Winfrey, sem er 69 ára gömul, er íklædd Dolce & Gabbana pallíettu síðkjól og geislar af æskuljóma á leið sinni á Academy Museum Gala í Los Angeles. 

Winfrey, sem hefur verið þekkt fyrir að rokka upp og niður í þyngd í gegnum árin, er í ótrúlegu formi í dag enda mikil áhugamanneskja um heilbrigt líferni. Spjallþáttadrottningin hefur opinberlega gagnrýnt notkun á Ozempic, hinu umtalaða „töfralyfi“ í Hollywood, og segir það „auðveldu leiðina út.“

Mynd Winfrey vakti því mikla athygli og spunnust í kjölfar hennar upp miklar umræður í netheimum, en fjölmargir fylgjendur sjónvarpskonunnar segja hana hafa leitað í lyfið fyrir skjótan þyngdarmissi. Winfrey lokaði skjótt á athugasemdir við myndina.  

Winfrey stillti sér upp með fjölmörgum meðlimum Hollywood-elítunnar á viðburðinum og þar á meðal Óskarsverðlaunaleikkonunni Meryl Streep.