Fyrri undanúrslit Söngvakeppni sjórnvarpsins hófust í kvöld. Fimm lög af þeim tíu sem keppa til sigurs voru flutt í beinni útsendingu á Rúv í kvöld en lögin Bíómynd með hljómsveitinni VÆB og Stingum af með Anítu Rós Þorsteinsdóttur voru kosin áfram í úrslit í Laugardalshöll þann 2. mars.

Sjá þig með Blankiflúr, Fiðrildi með Sunny og Ró með CeaseTone náðu ekki brautargengi.

Atkvæðagreiðsla almennings réð för í kvöld og gat fólk kosið með því að hringja eða senda skilaboð eða í gegnum appið Rúv stjörnur.

Kynnar kvöldsins voru þau Unnsteinn Manuel, Ragnhildur Steinunn og Siggi Gunnars. Auk keppenda stigu Sigríður Beinteinsdóttir og Friðrik Ómar Hjörleifsson á stokk og skemmtu áhorfendum.