Oppenheimer sigurvegari BAFTA-hátíðarinnar

Kvikmyndin Oppenheimer, í leikstjórn Christopher Nolan, stóð uppi sem sigurvegari á BAFTA verðlaunahátíðinni sem fram fór í kvöld.

Fékk hún sjö verðlaun samtals og var valin besta kvikmyndin, Christopher Nolan var valinn besti leikstjórinn, írski leikarinn Cillian Murphy valinn besti leikarinn og Robert Downey Jr. hlaut verðlaun í flokki aukaleikara. Þykir þetta benda til góðs gengis myndarinnar á Óskarsverðlaunahátíðinni sem fer fram í mars.

Gott gengi Poor Things

Nolan þakkaði kvikmyndaframleiðandanum Universal í þakkarræðu sinni fyrir að hafa leyft sér og teymi sínu að gera „eitthvað þungt og trúa á það“.

Kvikmyndin Poor Things stóð einnig uppi sem sigurvegari með fimm verðlaun, þar af til Emmu Stone sem valin var besta leikkonan. 

Barbie og Saltburn fengu engin verðlaun

Þá fékk leikkonan Da'Vine Joy Randolph verðlaun í flokki aukaleikara og þakkaði í ræðu sinni samleikara sínum Paul Giamatti: „Guð, ég græt alltaf þegar ég sé nafnð þitt. Þú stendur fyrir allt sem er gott og frábært í okkar listsköpun.“

Dramatíska kvikmyndin The Zone of Interest, í leikstjórn Jonathan Glazer, fékk verðlaun fyrir að vera mest framúrskarandi breska myndin auk þess sem hún var valin besta myndin í flokki mynda á öðru tungumáli en ensku. Barbie, Saltburn, Maestro og Killers of the Flower Moon, fóru tómhentar af hátíðinni.