Önnur kona stígur fram vegna Depardieu

Franska kvikmyndastjarnan Gerard Depardieu hefur á ný verið sakaður um ósæmilega kynferðislega hegðun. Hann var fyrst sakaður um nauðgun og kynferðislegt ofbeldi af mun yngri konu, mótleikkonu sinni, árið 2018 og frá því hafa nokkrar konur stigið fram og greint frá svipaðri reynslu. Depardieu þvertekur fyrir allar ásakanir á hendur sér um kynferðislegt ofbeldi.

Frétt af mbl.is

Depardieu sakaður um nauðgun

Frétt af mbl.is

Segja að Depardieu hafi verið „hengdur“

Nýjasta kæran gegn honum varðar kynferðislegt ofbeldi á tökustað frá árinu 2021. Leikmyndahönnuður sem starfaði með Depardieu við gerð kvikmyndarinnar „Le Volets verts“ hefur nú ásakað hinn 75 ára gamla leikara um ósæmilega hegðun.

Sagði mjög óviðeigandi hluti

Lögfræðingur leikmyndahönnuðarins, Carine Durrieu-Diebolt, ræddi við Agence France-Presse á sunnudag. Í samtali við franska miðilinn staðfesti hún að dómkrafa væri þegar komin í hendur ríkissaksóknara í París, en hvorki talsmenn ríkissaksóknara né lögfræðingar Depardieu hafa tjáð sig um nýju ákæruna.

Leikmyndahönnuðurinn greindi frá því þann 10. september 2021 að Depardieu hafi horft á sig af mikilli fyrirlitningu, sagt mjög óviðeigandi hluti og gripið í sig og nuddað líkamshluta, þar á meðal mjaðmir og brjóst.

Samkvæmt ákæru þá var önnur kona sem ásakaði Depardieu um svipað athæfi á sama tökusetti.

• Blogga um frétt