Whoopi Goldberg, Óskarsverðlaunaleikkona og einn af þáttastjórnendum bandaríska spjallþáttarins The View, kom Katrínu, prinsessu af Wales, til varnar í mánudagsþætti The View. Goldberg skilur ekki lætin í kringum ljósmyndina og segir fjölmiðla gera úlfalda úr mýflugu.
„Fyrirgefðu,“ sagði Goldberg hátt og skýrt áður en hún hóf upp raust sína. „Ég þekki ekki marga sem fikta ekki við ljósmyndir sínar áður en þeir birta þær fyrir almenningsaugum,“ sagði leikkonan. „Hún er framtíðardrottning Bretlands, en hér er hún, áhugaljósmyndari. Þetta er það sem þeir gera.“
Mikið fjaðrafok hefur verið í kringum ljósmyndina sem sýnir Katrínu ásamt börnum sínum.
Reuters, AP, Getty og AFP afturkölluðu myndina úr kerfum sínum í fyrrakvöld og vöruðu fjölmiðla við notkun myndarinnar. AP sagði ástæðuna vera að í ljós hefði komið að átt hefði verið við myndina.