Veröld/Fólk | mbl | 9.4.2024 | 10:38 | Uppfært 26.6.2024 13:52

Jóhanna Guðrún flytur þjóðhátíðarlagið í ár

Tónlistarkonan Jóhanna Guðrún Jónsdóttir flytur þjóðhátíðarlagið í ár!

Tónlistarkonan Jóhanna Guðrún Jónsdóttir er höfundur og flytjandi þjóðhátíðarlagsins árið 2024. Lagið ætlar hún að vinna með Halldóri Gunnari Pálssyni og hlakkar til að leyfa þjóðinni að heyra það á vordögum.

Þjóðhátíð í Vestmannaeyjum er vinsælasta útihátíð landsins og hefur verið haldin árlega í ágústmánuði frá árinu 1916, að undanskildu 2020 og 2021 vegna heimsfaraldursins.

Það er nóg um að vera hjá Jóhönnu Guðrúnu þessa dagana!

„Þetta er lagið sem ég hef verið að leita að“

Það er því nóg um að vera hjá Jóhönnu Guðrúnu þessa dagana, en síðastliðinn föstudag gaf hún líka út ábreiðu af laginu Hetjan með Herra Hnetusmjöri, Hugin og Þormóði Eiríkssyni.

„Steindi Jr. sagði að honum langaði að heyra þetta lag í mínum flutningi. Þegar ég var búin að hlusta á lagið að þá rann það upp fyrir mér að þetta er lagið sem að ég hef verið að leita að en mig hefur lengi langað til að gera svona ábreiðu, með lagi sem að fólk myndi ekki endilega giska á að ég myndi flytja. Ég lét bara vaða og er virkilega ánægð með útkomuna og ég vona að þið séuð það líka,” segir Jóhanna Guðrún

„Mömmur þurfa pásu“

Mamma þarf að djamma snýr svo aftur laugardaginn 13. apríl. Viðburðurinn er skapaður til að gera konum í atvinnulífinu á Íslandi hátt undir höfði eina kvöldstund þar sem konur, vinkonur, mæðgur og allt fólk sem vill hafa gaman og heiðra konurnar í lífi sínu koma saman. Mömmur þurfa pásu, hvíld frá þriðju vaktinni, njóta lífsins og hafa gaman. En að sjálfsögðu eru öll kyn velkomin. Viðburðurinn er upplifun en ekki bara tónleikar.

„Á honum fá kvenfrumkvöðlar tækifæri til að kynna fyrirtækin sín svo þetta er eins og lítið fyrirtækja „expo“ fyrir konur í atvinnulífinu. Við bjóðum síðan upp á frábæra tónleika dagskrá. Viðburðurinn á að vera hvatning og innblástur fyrir aðra sem vilja fara í rekstur eða stofna eigið fyrirtæki.

Þessi hugmynd kom í kjölfarið af því að ég hef sungið þetta skemmtilega lag síðan 2013 með Baggalúti og það hefur fylgt mér alla tíð síðan og mig langaði bara hreinlega að gera eitthvað meira úr því! Þannig fór ég að velta því fyrir mér hvernig væri hægt að fagna konum í gegn um þetta lag og þá spratt hugmyndin að þessum viðburði,“ útskýrir Jóhanna guðrún.

Samhliða undirbúningi á Mamma þarf að djamma hefur Jóhanna gefið út vel valin lög með Halldóri Gunnari sem hafa verið flutt alla föstudaga fram að viðburði í útvarpsþættinum FM95BLÖ, en Hetjan er einmitt eitt af þeim. Lögin eru komin út á Spotify og það lag sem fær bestu viðtökurnar þar verður svo flutt á tónleikunum.