Eurovisionfari til rannsóknar hjá lögreglu

Keppandi Hollendinga í Eurovision, Joost Klein, er sakaður um „ólöglegar hótarnir“ í Eurovision-höllinni í Malmö. Sænska lögreglan er með málið til rannsóknar. 

Sænski miðillinn Aftonbladet greinir frá. 

Úrslitakvöld Eurovision fer fram í kvöld og er óljóst hvort Klein fái að taka þátt. Honum var ekki leyft að taka þátt í æfingarennslinu sem fór fram í gær. 

Átti sér stað á fimmtudag

Atvikið er talið hafa átt sér stað á fimmtudagskvöld, sama kvöld og Klein keppti í undanúrslitum Eurovision. Samkvæmt upplýsingum frá sænsku lögreglunni hefur hún verið að rannsaka hótanir sem áttu sér stað í Eurovision-höllinni í Malmö. Hefur lögregla rætt við vitni og gripið til annarra rannsóknaraðgerða.

Aftonbladet hefur hins vegar eftir heimildum sínum að Klein hafi beitt konu sem starfar við sjónvarpsframleiðslu ofbeldi.

Blaðamaður Aftobladet leitaði eftir viðbrögðum Klein en hann svaraði engu.

Þegar þessi frétt er skrifuð er Hollendingum spáð 7. sæti í keppninni.

• Blogga um frétt