Rannsaka dauða Matthew Perry

Lögeglan í Los Angeles hefur hafið rannsókn á dauða Friends-leikarans Matthew Perry.

Perry lést í október á síðasta ári vegna bráðra áhrifa ketamíns en lögregla rannsakar nú hvernig Perry hafi komst yfir efnið samkvæmt BBC.

Keta­mín er sterkt svæf­ing­ar- og deyfi­lyf sem einnig get­ur kallað fram of­skynj­an­ir og er því sömuleiðis notað sem vímu­efni. Hef­ur það einnig notið aukinna vin­sælda á síðustu árum til að vinna bug á áfeng­is­sýki og geðrænum kvillum eins og þunglyndi.

Var í ketamínmeðferð hjá lækni

Í yfirlýsingu til fjölmiðla staðfesti lögreglan í Los Angeles að rannsóknin væri unnin í samstarfi við fíkniefnalögreglu og bandaríska pósteftirlitið. Ekki er vitað hversu langt rannsóknin er komin eða hverjir hafi verið yfirheyrðir í tengslum við hana.

Eru nokkrir aðrir þættir sagðir kunna hafa átt þátt í dauða Perry svo sem drukknun, kransæðasjúkdómur og áhrif búprenorfíns sem Perry notaði gegn ópíóðafíkn.

Hafði Perry lengi glímt við áfengis- og vímuefnafíkn á fullorðinsárunum og oft leitað sér aðstoðar meðferðaraðila.

Var hann í ketamínmeðferð, undir eftirliti læknis, við kvíða og þunglyndi er hann lést. Í skýrslu réttarmeinafræðings segir þó að læknir Perry hafi ekki veitt honum ketamínmeðferð í yfir eina og hálfa viku er hann lést og því óljóst hvaðan hann hafi fengið svo mikið magn ketamíns.

• Blogga um frétt