Leikarinn Nick Pasqual var handtekinn í Texas á miðvikudag grunaður um að hafa stungið fyrrverandi kærustu sína, förðunarfræðinginn Allie Sehorn. Pasqual var handtekinn við landamæri Mexíkó er hann reyndi að flýja land.
Pasqual, 34 ára, er sagður hafa brotist inn á heimili Sehorn í Kaliforníu aðfaranótt 23. maí og stungið hana margsinnis. Samkvæmt fjölmiðlum vestanhafs sótti Sehorn um nálgunarbann gegn Pasqual aðeins dögum fyrir árásina.
Sehorn fannst liggjandi í blóði sínu með mikla áverka á hálsi, kvið og handleggjum. Hún var flutt með hraði á sjúkrahús en er á batavegi að sögn aðstandenda.
Pasqual gæti átt yfir höfði sér lífstíðarfangelsisdóm verði hann fundinn sekur um tilraun til manndráps, innbrot á heimili og ofbeldi í sambandi.