Frumfluttu lag á djasshátíðinni

Djasskrakkar í Mosfellsbæ og Karl Olgeirsson frumfluttu lagið Blár Krummi á hátíðinni Barnadjass í Mosó.

Um er að ræða alþjóðlega djasshátíði þar sem flytjendurnir eru á aldrinum sjö til fimmtán ára. Þau koma frá Mosfellsbæ, Hafnarfirði, Kópavogi, Ísafirði, Reykjavík, Noregi og Færeyjum. Eiga þau meðal annars rætur að tekja til Afganistan, Hollands, Kína, Nígeríu, Palestínu, Litháen og Svíþjóðar.

Þetta kemur fram í tilkynningu.

Anna Sigríður Guðnadóttir, bæjarfulltrúi og nefndarkona í menningar- og lýðræðisnefnd bæjarins, setti hátíðina formlega í Hlégarði á fimmtudaginn. 

Cecilie Willoch, sendiherra Noregs á Íslandi, hélt ræðu sem var einkar viðeigandi þar sem hér er á ferðinni menningarsamstarf milli Íslands og Noregs, að því er fram kemur í tilkynningunni.

Listrænn stjórnandi hátíðarinnar er Odd André Elveland en hann er norskur djasstónlistarmaður og rekur tónlistarskólann Improbasen i Osló.

Lokatónleikar hátíðarinnar verða haldnir á morgun í Hlégarði klukkan 16. 

Frá hátíðinni. Ljósmynd/Aðsend

• Blogga um frétt