Dr. Ruth er látin

Dr. Ruth Westheimer kynlífsráðgjafi er látin 96 ára að aldri. Westheimer lést í gær, föstudag.

Breska ríkisútvarpið greinir frá.

Westheimer, oftast kölluð dr. Ruth, varð heimsfræg fyrir að tala opinskátt um kynlíf og sem metsöluhöfundur fyrir leiðbeiningar eins og „Kynlíf fyrir heimskingja“ og sjónvarpsþættina „Dr. Ruth Show“.

Auk þess skrifaði hún 40 bækur og birtist í fjölda heimsfrægra spjallþátta, eins og the Tonight Show og The Ellen Degeneres Show.

„Ég vissi að það var mikil þekking til staðar sem var ekki að ná til yngri kynslóða,“ sagði hún aðspurð um ferilinn sinn árið 2019.

Dr. Ruth fæddist árið 1928 í Þýskalandi og var af gyðingaættum. Árið 1938 þegar hún var tíu ára sendu foreldrar hana eina til Sviss til að flýja komandi stríð.

Hún sá foreldra sína aldrei aftur og trúði því að þau hefðu verið drepin í útrýmingarbúðum í Auschwitz.

• Blogga um frétt