Léku Ísland á litlum bar

Íslandsvinirnir í bandaríska proggmálmbandinu Mastodon skutu óvænt upp kollinum á lítilli knæpu í Atlanta í Georgíuríki, Star Bar, á þriðjudagskvöldið og hlóðu í tónleika, gestum til ómældrar undrunar en um leið ánægju.

Meðal 13 laga sem fengu að hljóma var Ísland af breiðskífunni Leviathan frá 2004 en það fjallar einmitt, eins og nafnið bendir til, um lítið land á hjara veraldar, sem við þekkjum öll mætavel. Um var að ræða upphitun fyrir tónleikaferðalag sem hófst á föstudagskvöldið, þar sem 20 ára útgáfuafmæli Leviathan er fagnað. Annað málmsmetandi band er með í för, Lamb of God, en tímamótaplata þess, Ashes of the Wake, er einnig tvítug í ár.

Engir eymingjar sjá um að hita mannskapinn upp á túrnum, annars vegar sólóbandið hans Kerrys Kings og hins vegar Malevolence. Ganga má út frá a.m.k. 40 metrum á sekúndu.