Leikkonan Gena Rowlands er látin 94 ára að aldri. Rowlands var frægust fyrir leik sinni í kvikmyndunum A Woman Under the Influence og The Notebook.
Á vef TMZ kemur fram að Rowlands hafi látist á miðvikudag á friðsælan hátt í faðmi fjölskyldu sinnar.
Sonur Rowlands, leikstjórinn Nick Cassavets, greindi frá því fyrr í sumar að móðir hans væri með alzheimer-sjúkdóminn. Cassavets sem leikstýrði The Notebook sagði jafnframt við sama tilefni að hann hefði hugsað mikið um kvikmyndina. „Ég fékk móður mína til að leika eldri Allie og við vörðum miklum tíma saman í að tala um Alzheimer því við vildum að persóna hennar yrði einlæg. Núna síðustu fimm árin hefur hún sjálf verið að glíma við Alzheimers. Sjúkdómurinn hefur tekið yfir en þetta er svo klikkað því við höfum þekkt fólk með sjúkdóminn, hún lék þetta og nú er komið að okkur,“ segir Cassavets í sumar.