Brad Pitt borðaði í Dalakofanum
Setja bókamerki
Bandaríski stórleikarinn Brad Pitt gladdi heldur betur starfsmenn í Dalakofanum í Laugum í Reykjadal í gær. Rúllaði hann í hlaðið á mótorhjóli ásamt þremur öðrum mönnum.
Guðrún Dwayne Boyd, annar eigandi Dalakofans, eldaði hamborgarana ofan í Pitt og félaga og segir að þeir hafi verið alsælir með matinn.
Brad Pitt fékk sér hamborgara, salat og pepsi og var ánægður með matinn. Heimsóknin varði í um klukkutíma.
„Við erum eiginlega svolítið dofnar. Við erum eiginlega að fatta það í morgun að hann hafi verið hérna,“ segir Guðrún, spurð að því hvernig starfsmenn hafi brugðist við.
Í myndskeiðinu að ofan má sjá þegarBrad Pitt fer af stað í burtu frá Dalakofanum.
Fékk að vera í friði
Guðrún segir að starfsmenn hafi komið fram við hann eins og hvern annan kúnna og að aðrir viðskiptavinir hafi látið hann í friði.
„Hann fékk bara alveg að vera í friði,“ segir Guðrún.
Brad Pitt var með sólgleraugu og húfu og því var ekki augljóst við fyrstu sýn hvort að um hann væri að ræða en svo tók hann af sér sólgleraugun og þá var ekki lengur vafi á því.
„Þá fór það ekkert fram hjá okkur“
„Þetta var nú bara þannig að það var einn starfsmaður hérna sem fylgdi þeim til borðs og lætur þá bara fá matseðil og svo fer hún bara. Svo er ég að fara mat á borðið við hliðina á þeim og var svona samt ekkert alveg viss hvort að þetta væri hann því hann var með húfu og sólgleraugu hérna inni,“ segir hún.
Guðrún fór svo af veitingastaðnum og að afgreiða í versluninni tímabundið.
„Svo kem ég til baka og þá er hann búinn að taka af sér sólgleraugun. Þá fór það ekkert fram hjá okkur að þetta væri hann,“ segir hún.
Þegar hann og vinir hans lögðu af stað í burtu þá fóru nokkrir viðskiptavinir á fætur til að fylgjast með því hvert Pitt væri að fara.
Lát hjóna í Neskaupstað: Ákæra gefin út
Forstjóri bendir á ábyrgð birgja vegna verðhækkana
Stóðu skógarþjófa að verki
Auglýsingin var villandi
Beint: Hverjir verða í nýrri ríkisstjórn?
„Börn heima sem maður myndi vilja hafa í skjóli“