Nú þegar haustið fer að dragast nær og hitastigið að hrynja er ágætt að skoða hvaða kvikmyndir eru væntanlegar í bíó eða á streymisveitur í haust.
Haustið hefur verið annasamasta árstíðin í kvikmyndabransanum síðustu áratugi en þá fara konfektmolarnir, sem kvikmyndafyrirtækin telja geta keppt til Óskarsverðlauna í voru, að koma í bíó eða á streymisveitur.
Hér kemur því stutt úttekt á nokkrum væntanlegum kvikmyndum sem veðbankar telja líklegar til verðlauna.
Á Óskarsverðlaununum árið 2001 hreppti kvikmyndin Gladiator fimm verðlaun. Núna 23 árum seinna hyggst Ridley Scott endurtaka leikinn. Söguþráðurinn endurspeglar mikið fyrri myndina en kynnir til leiks marga nýja karaktera.
Kvikmyndin gerist nokkrum áratugum eftir atburði fyrri myndar og fjallar um Lucius, barnabarn Markúsar Árelíusar, fyrrverandi keisara Rómar og son Lucillu, sem gerist skylmingarkappi til að hefna fjölskyldu sinnar
Mexíkóski glæpasöngleikurinn Emilia Perez sló í gegn á kvikmyndahátíðinni í Cannes í ár. Myndin fjallar um lögfræðinginn Ritu sem aðstoðar háttsettan glæpaforingja við að undirgangast kynskipti.
Zoe Saldana, Karla Sofia Gascón og Selena Gomez fara með aðalhlutverk í kvikmyndinni sem fékk mikið lof hjá gagnrýnendum á hátíðinni. Streymisveitan Netflix öðlaðist útgáfuréttinn á kvikmyndinni og geta áhorfendur horft á hana þar í haust.
Ralph Fiennes fer með aðalhlutverið í kvikmyndinni Conclave sem er byggð á samnefndri bók Robert Harris frá 2016.
Eftir andlát páfans er Lawrence kardínála falið það verk að velja nýjan páfa. Þegar valdamestu leiðtogar kaþólsku kirkjunnar um allan heim safnast saman í Vatíkaninu lendir Lawrence í miðju samsæris sem á eftir að hrista stoðir kirkjunnar.
Ítarlegri úttekt á væntanlegum kvikmyndum má finna í Sunnudagsblaði Morgunblaðsins um helgina.