Dánarstjóri í Los Angeles í Bandaríkjunum hefur úrskurðað um dánarorsök Lucy-Bleu Knight, stjúpdóttur gítarleikarans Slash. Knight lést á heimili sínu í borginni þann 19. júlí síðastliðinn, 25 ára að aldri. Tók hún sitt eigið líf.
Slash, sem heitir réttu nafni Saul Hudson, greindi frá andlátinu á Instagram-reikningi sínum örfáum dögum eftir andlátið. Tónlistarmaðurinn birti skjáskot úr dánartilkynningu á samfélagsmiðlasíðunni og einnig mynd af Knight.
Slash, sem sló í gegn með rokkhljómsveitinni Guns N'Roses, hefur verið í sambandi með móður Knight frá árinu 2015 og gekk henni í föðurstað. Gítarleikarinn á tvö uppkomin börn úr fyrra hjónabandi.
Embætti landlæknis bendir á að mikilvægt sé að þeir sem glíma við sjálfsvígshugsanir segi einhverjum frá líðan sinni, hvort sem er aðstandanda eða hafi samband við Hjálparsíma Rauða krossins 1717, eða á netspjalli 1717.is, við hjúkrunarfræðing í netspjalli á heilsuvera.is eða við ráðgjafa í síma Píeta-samtakanna s. 552-2218. Píeta-samtökin bjóða einnig upp á ráðgjöf og stuðning fyrir aðstandendur þeirra sem glíma við sjálfsvígshugsanir.
Fyrir þau sem misst hafa ástvin í sjálfsvígi bendir landlæknisembættið á stuðning í sorg hjá Sorgarmiðstöðinni í síma 551-4141 og hjá Píeta-samtökunum í síma 552-2218.