Ríkisútvarpið hefur nú staðfest þátttöku í Eurovision sem haldin verður í Basel í Sviss í maí á næsta ári.

Ísland hefur tekið þátt í keppninni frá árinu 1986. Fram kemur í fréttatilkynningu frá RÚV að ákvörðunin um þátttöku byggist fyrst og fremst á því að um sé að ræða viðburð sem hefur mikið gildi í íslensku samfélagi, er uppspretta gleði og ánægju hjá stórum hluta þjóðarinnar og vettvangur dýrmætra samverustunda fjölskyldna um land allt. Keppnin hefur mikla og óumdeilda þýðingu fyrir íslenskt tónlistarlíf. Eurovision og Söngvakeppnin hafa getið af sér ótal margar íslenskar söngperlur og lagt grunninn að glæstum ferli fjölda tónlistarfólks. Áhorf á úrslitakvöld Eurovision mældist 60% í ár þótt Ísland væri fallið úr keppni. Einungis stærstu íþróttaviðburðir og Áramótaskaupið komast nálægt þessu áhorfi.

Samtök Evrópskra sjónvarpsstöðva (EBU) hafa ákveðið að fara í umfangsmikla vinnu til þess að bregðast við gagnrýni í tengslum við keppnina í ár og ýmsar skipulagsbreytingar eru í umræðunni sem eiga m.a. að leggja áherslu á að vernda ópólitíska ásýnd keppninnar, skapa fjölskylduvænan viðburð og styrkja stoðir Eurovision til framtíðar. Nú eru níu vinnuhópar að störfum og stefnt er að því að þeir skili niðurstöðum úr vinnunni á næstu mánuðum. Ríkisútvarpið hefur komið sínum athugasemdum að í þeirri úttekt þar sem m.a. var greint frá afar neikvæðri umræðu hér á landi fyrir síðustu keppni. Nú þegar hafa nánast allar þjóðir tilkynnt þátttöku í Sviss á næsta ári.

Fyrirkomulag á vali á framlagi Íslands kynnt síðar

Enn hefur ekki verið ákveðið með hvaða hætti framlag Íslands í Eurovision 2025 verður valið. Síðustu ár hefur sigurvegari Söngvakeppninnar haldið utan fyrir Íslands hönd í Eurovision, en ákvörðun um fyrirkomulagið núna verður tekin á næstu vikum.

Tengdar fréttir

Eurovision

Playboy-fyrirsæta tekur þátt í undankeppni Eurovision

• Íbúar Basel samþykkja fjármögnun Eurovision
• Hollendingar taka þátt í Eurovision eftir brottvísun
• Þekktur sigurvegari Eurovision látinn
• Söngvakeppnin haldin í Basel

» Fleiri tengdar fréttir

• Blogga um frétt