„Sjáumst í feitu flippi“

Grínkjallarinn hefur göngu sína annað kvöld, fimmtudaginn 19. september í Þjóðleikhúskjallaranum, en boðið verður upp á glens og grín öll fimmtudagskvöld í vetur.

Fyrstur til að stíga á stokk verður grínistinn og þjóðargersemin Ari Eldjárn. Hann vígir sviðið ásamt svokölluðum grínstjórum kjallarans, Hugleiki Dagssyni, Heklu Elísabetu Aðalsteinsdóttur, Stefáni Ingvari Vigfússyni og Þórdísi Nadiu Semichat. Öll stíga þau á svið ásamt Ara annað kvöld en næstu fimmtudagskvöld skiptast þau á að hita upp og kynna á svið fleiri eiturfyndna grínista.

Meðal þeirra sem koma fram í vetur eru þau Bergur Ebbi Kristjánsson, Saga Garðardsóttir, Snjólaug Lúðvíksdóttir, Jakob Birgisson, Vigdís Hafliðadóttir, Vilhelm Neto, Jóhann Alfreð Kristinsson og fleiri.

„Ég er svo spenntur að ég er gjörsamlega að missa legvatnið. Sjáumst í feitu flippi!“ segir Hugleikur Dagsson einn af fjórum grínstjórum Grínkjallarans.

Nánar hér. 

• Blogga um frétt