Erum allar með svikaraheilkenni

Þóra, Þórdís, Sunna, Ragnheiður, Melkorka og Fríða eru Svikaskáld. Ljósmynd/Jón Heiðar Gunnarsson

„Svikaskáldin eru komin til að vera, enda bæði magnað og dásamlegt að tilheyra svona hópi og fá að vinna saman að skrifum, það er mikil gjöf í lífinu,“ segir Ragnheiður Harpa Leifsdóttir, ein þeirra sex skáldkvenna sem skipa ljóðakollektífið Svikaskáld.

Hinar eru Fríða Ísberg, Melkorka Ólafsdóttir, Sunna Dís Másdóttir, Þóra Hjörleifsdóttir og Þórdís Helgadóttir. Saman hafa þær gefið út eina skáldsögu og fjögur ljóðverk. Nýlega sendu þær frá sér sitt fimmta verk, ljóðabókina Ég er það sem ég sef.

„Þrjú ár eru liðin frá því síðasta verk frá okkur kom út, enda nokkur börn fæðst í millitíðinni innan hópsins. Við erum með vinnustofu saman í Gröndalshúsi í miðbæ Reykjavíkur og hittumst oft þar, þótt við náum sjaldan að vera allar í einu. Við reynum að hafa sem þráð í lífinu að hittast og skrifa, það gefur okkur svo mikið,“ segir Ragnheiður Harpa og bætir við að þær hafi kynnst þegar þær voru allar í námi í ritlist á sama tíma í Háskóla Íslands.

Viðtal við Ragnheiði Hörpu var birt á menningarsíðum Morgunblaðsins síðastliðinn þriðjudag, 1. október.