Dóu í sama svefnherberginu

Rokkstjörnurnar Keith Moon og Mama Cass Elliot létust ekki bara í sömu íbúðinni í Lundúnum, heldur í sama herberginu, með fjögurra ára millibili, 1974 og 1978. Bæði voru þau 32 ára.

Bandaríski tónlistarmaðurinn og lagahöfundurinn Harry Nilsson var á báðum áttum þegar til tals kom að Keith Moon, trymbill rokkbandsins The Who, myndi leigja af honum litla íbúð á efstu hæð í fjölbýlishúsi við Curzon Place 9 í Mayfair-hverfinu í Lundúnum sumarið 1978.

Mama Cass Elliot, úr The Mamas and the Papas. Wikimedia

Moon var þekktur fyrir villt líferni sitt og óhóflega drykkju og lyfjanotkun, auk þess sem Nilsson þótti óþægilegt að fræg manneskja hafði þegar borið beinin í íbúðinni, Mama Cass Elliot úr þjóðlagarokkbandinu The Mamas and the Papas, fjórum árum áður. Pete Townshend, gítarleikari The Who, á hins vegar að hafa róað taugar leigusalans með þeim orðum að eldingu lysti aldrei niður tvisvar á sama stað.

Það gerðist þó og fáeinum vikum síðar var Moon allur. Hann lést í svefnherbergi íbúðarinnar 7. september, á sama stað og Mama Cass hafði skilið við 29. júlí 1974. Það sem meira var, þau voru bæði 32 ára að aldri.

Keith Moon, trymbill The Who. Wikimedia

Andlát þeirra bar þó að með ólíkum hætti. Banamein Mama Cass var hjartaáfall sem mögulega tengdist heilsu hennar en hún hafði lengi glímt við offitu. Moon lést hins vegar úr ofskammti lyfsins Heminevrin sem draga á úr áfengisfráhvörfum en það getur verið lífshættulegt sé því blandað saman við alkóhól. Moon var á þessum tíma mjög illa farinn vegna ofneyslu áfengis og lyfja. 

Nánar er fjallað um þetta óvenjulega mál í Sunnudagsblaði Morgunblaðsins.