Nýjar ásakanir á hendur Sean „Diddy“ Combs

Rapparinn og tónlistarframleiðandinn Sean „Diddy“ Combs hefur fengið á sig fimm nýjar málsóknir þar sem hann er sakaður m.a. um nauðganir, byrla meintum fórnarlömbum sínum ólyfjan og hóta þeim lífláti.

Þetta kemur fram á Page Six.

Í dómskjölum segir ein kvennanna að Combs hafi nauðgað henni árið 2004 eftir að henni hafi verið boðið í myndatöku á hans vegum og síðan á hótelherbergi á Marriott hótelinu. 

Í öðrum dómskjölum sem fram hafa komið segir að karlmaður saki Combs um gróft kynferðisbrot gagnvart sér inni á lager stórverslunarinnar Macy's.

Fleiri ásakanir í þessum dúr er að finna meðal þessara fimm málsókna.

Kallað hefur verið eftir viðbrögðum lögfræðiteymis Combs, en teymið hefur ekki svarað fyrirspurnum. 

Rapparinn hefur ítrekað neitað sök síðan hann var fyrst handtekinn í september síðastliðnum. Hefur hann verið ákærður fyrir kynlífsmansal, fjársvik og vændi. Hann er í haldi í Brooklyn í New York, án tryggingar. 

• Blogga um frétt