Ásakanir um heimilisofbeldi aðdragandi andlátsins

Hinn 31 árs gamli Liam Payne varði lunganum af ævinni fyrir framan augu almennings m.a. sem meðlimur hljómsveitarinnar One Direction.

Söngvarinn frá Wolverhampton á Englandi er sagður hafa framið sjálfsvíg í Buenos Aires í gærdag.

Áður en frægðarsól hans tók að skína hafði hann farið í áheyrnarprufur í The X Factor sem báru ekki árangur, eins og segir á fréttaveitu AFP.

En þegar hann var aðeins 16 ára gamall fór tónlistarferillinn á flug með hljómsveitinni One Direction, ásamt meðlimum hennar Niall Horan, Harry Styles, Louis Tomlinson og Zayn Malik.

Aðdáendur breska söngvarans kveiktu á kertum í gær við hótelið í Buenos Aires þar sem andlát hans bar að. Luis ROBAYO / AFP

Fjöldi verðlauna

Næstu sex árin á eftir naut hópurinn heimsfrægðar og seldi meira en 70 milljónir eintaka af plötum sínum. Alls urðu tónleikaferðalögin fjögur og þeir unnu til tæplega 200 verðlauna á ferlinum.

Payne sem var af samstarfsfélögum sagður kurteis og auðmjúkur, var einnig talinn drifkrafturinn á bak við One Direction. Hann átti stóran hlut í nokkrum af ástsælustu lögum hljómsveitarinnar.

Árið 2015 yfirgaf Malik hljómsveitina og ári síðar fór hljómsveitin í ótímabundið hlé og hófu þá aðrir meðlimir sólóferil sinn. Sólósmáskífa Payne, Strip That Down, kom út 2017 og náði þriðja sæti breska smáskífulistans.

Fjórir meðlimir One Direction á Billboard-tónlistarverðlaununum árið 2015 (frá vinstri): Liam Payne, Harry styles, Niall Horan og Louis Tomlinson. Robyn BECK / AFP

Aðdáendur í Buenos Aires í gær. Luis ROBAYO / AFP

Erfiðleikar og gagnrýni

Á síðasta ári gaf hann út að ný sólóplata væri í vændum eftir að hafa seinkað tónleikaferð sinni vegna heilsufarsvandamála. Síðasta smáskífa Payne kom út í mars á þessu ári og heitir Teardrops.

Hann hefur talað opinskátt um áfengisvanda sinn og hve krefjandi það var að takast á við frægðina svo ungur að aldri. Skömmu fyrir andlátið varð hann harðlega gagnrýndur á samfélagsmiðlum í kjölfar viðtals þar sem fyrrverandi sambýliskona hans, Maya Henry, sakaði hann um að hafa beitt sig ofbeldi.

Ljóst er að andlát Payne skilur eftir sár í brjósti margra aðdáenda hans. Hann lætur eftir sig son úr fyrra sambandi við Girls Aloud-söngkonuna Cheryl. 

• Blogga um frétt