Bandaríski leikarinn Michael Newman er látinn, 68 ára að aldri.
Newman var best þekktur fyrir hlutverk sitt í þáttaröðinni Baywatch sem var sýnd við miklar vinsældir á árunum 1989 til 2001.
Hann fór með hlutverk strandvarðarins Michael „Newmie“ Newman og lék í 150 þáttum yfir sýningartímabilið.
Newman starfaði einnig sem slökkviliðsmaður og sinnti því samhliða leikferlinum.
Góðvinur leikarans greindi frá andláti hans í samtali við tímaritið People.
Newman hafði háð erfiða baráttu við taugahrörnunarsjúkdóminn Parkinson frá árinu 2006 og hafði heilsu hans hrakað mjög á síðustu mánuðum. Newman lést á heimili sínu á sunnudag, umkringdur fjölskyldu sinni.