David Walliams þurfti að bæta öðrum viðburði við

„Þegar hann kom hingað fyrir tveimur árum þá gátu færri hitt hann en vildu. Honum þótti það leiðinlegt og var því meira en til í að gera þetta aftur,“ segir Jónas Sigurgeirsson, útgefandi hjá Bókafélaginu.

Rithöfundurinn David Walliams kemur fram á tveimur viðburðum í Hörpu á sunnudag á vegum Bókafélagsins. Hann er á landinu í tengslum við Iceland Noir-bókmenntahátíðina og notar tækifærið til að hitta yngri lesendur í Hörpu á sunnudag. 

Mörg hundruð manns reyndu að fá Walliams til að árita bækur sínar í Smáralind. Ljósmynd/Aðsend

Sem kunnugt er hafa bækur Walliams notið mikilla vinsælda síðustu ár. Fyrir tveimur árum tróð hann upp í Bæjarbíói í Hafnarfirði og komust þar færri að en vildu. Við sama tækifæri áritaði hann bækur sínar í Eymundsson í Smáralind og þar mynduðust langar raðir en margir urðu frá að hverfa.

Frétt af mbl.is

Margir sátu eftir með sárt ennið í Smáralind

Það kemur því ekki á óvart að mikill áhugi er meðal aðdáenda Walliams á viðburðunum tveimur í Hörpu. Upphaflega stóð til að aðeins yrði einn slíkur haldinn en miðar seldust fljótt upp og því var öðrum bætt við. Enn eru lausir miðar á seinni viðburðinn klukkan 17 á sunnudag. Innifalið í miðaverðinu er önnur hvor nýja bókin hans, Voffbóti eða Verstu skrímsli í heimi.

Í kynningu kemur fram að David Walliams muni segja skemmtilegar sögur og lýsa því hvernig hann fær hugmyndir í bækurnar sínar. Þá muni hann svara spurningum áhorfenda, fara í leiki og gefa verðlaun. David Walliams mun einnig árita bækur og spjalla við gesti að atburði loknum.

Frétt af mbl.is

Walliams lék á als oddi í Bæjarbíói

• Blogga um frétt