Íslendingar hlusta mun frekar á karla

Engin íslensk tónlistarkona rataði á topplista Spotify sem hefur að geyma tíu vinsælust tónlistarmenn og lög meðal Íslendinga árið 2024. Þar eru þó tíu íslenskir karlar.

Sú hátíð er nú gengin í garð að Spotify hefur að nýju gefið út svokallaða Wrapped-lista sína fyrir árið og hefur gefið hverjum og einum notanda yfirlit yfir þá tónlist sem hann hefur hlustað hvað mest á á liðnu ári.

Streymisveitan hefur því enn á ný opnað flóðgáttir inn í hringrásir samfélagsmiðlanna, þar sem hver hlustandi á fætur öðrum keppist nú við að deila topplistanum sínum fyrir árið 2024.

Þegar litið er yfir topplista þjóðarinnar má finna lög eftir poppara á borð við PATR!K, ICEGUYS eða ClubDub. Og aldrei virðist landinn fá leið á Bubba.

En athygli vekur að ekki ein einasta tónlistarkona naut slíkra vinsælda meðal Íslendinga að hún skyldi enda á topplista Íslendinga, hvort sem litið er á vinsælustu lög ársins eða vinsælustu tónlistarmennina.

Þetta hlustuðu íslendingar á árið 2024

Þau lög sem Íslendingar hlustuðu mest á samkvæmt Spotify eru:

1. Skína með PATR!K og Luigi
2. Beautiful Things með Benson Boone
3. KOSS Á ÞIG (Áramótaskaup 2025) með Herra Hnetusmjör
4. Lose Control með Teddy Swims
5. MONNÍ með Aroni Can
6. BIRDS OF A FEATHER með Billie Eilish
7. Hvert ertu að fara? með Háska og PATR!K
8. Espresso með Sabrinu Carpenter
9. Krumla með ICEGUYS
10. Bad bitch í RVK með ClubDub

Þeir tónlistarmenn sem Íslendingar hlustuðu mest á samkvæmt Spotify eru:

1. Kanye West
2. Bubbi Morthens
3. Herra Hnetusmjör
4. Taylor Swift
5. Mustard
6. Drake
7. Daniil
8. Billie Eilish
9. Aron Can
10. Metro Boomin

Hvar eru konurnar?

Eins og sjá má á listunum er fátt um íslenskar konur, en þó fá erlendar söngkonur að skína, þar má helst nefna bandarísku poppsöngkonurnar Sabrina Carpenter, Taylor Swift og Billie Eilish.

Á lista yfir vinsælustu tónlistarmennina ratar Bríet í 12. sæti með rapparanum Birni en þau gáfu út plötu í sumar. Það er þó óljóst hvort Birnir eða Bríet eigi í raun sætið, en Bríet skýtur aftur upp höfði í 19. sæti listans.

Íslenska tónlistarundrið Laufey ratar í 29. sæti á listanum, en í dag var var greint frá því að hún skip­aði sæti á lista For­bes yfir ein­stak­linga 30 ára og yngri sem skarað hafa fram úr í tón­list­ar­heim­in­um á ár­inu sem er að líða.

Í 36. sæti á listamannalistanum er loks að finna Sesselju Magnúsdóttur, en vögguvísuplatan hennar Móðir og Barn er afar vinsæl meðal foreldra. Þar fyrir neðan má finna söngkonuna GDRN. Fleiri íslenskar söngkonur er ekki að finna á listanum.

Frétt af mbl.is

Laufey á lista Forbes

• Blogga um frétt