Sagður hafa látið konu hanga fram af svölum

Rapparinn Sean „Diddy“ Combs hefur verið sakaður um að hafa látið konu hanga fram af svölum á 17. hæð fjölbýlishúss.

Í nýrri kæru sem tískuhönnuðurinn Bryana „Bana“ Bongolan lagði fram í Los Angeles kemur fram að atvikið hafi gerst árið 2016 þegar hún var stödd heima hjá þáverandi kærustu Combs, Casandra „Cassie“ Ventura.

Yfir tuttugu konur hafa áður sakað Combs um ýmis brot, þar á meðal kynferðisbrot, byrlun, hótanir gegn vitnum og ofbeldi af öðrum toga.

Tónlistarmógúllinn hefur einnig verið ákærður fyrir mansal.

Bongolan segist í kærunni hafa ætlað að gista í íbúð Ventura. Combs byrjaði þá skyndilega að öskra og lemja á útidyrahurðina, að því er BBC greinir frá.

Eftir að hafa verið hleypt inn í íbúðina er Combs sagður hafa gengið til Bongolan, sem var þá stödd úti á svölum. Fram kemur í kærunni að hann hafi gripið hana og beitt hana ofbeldi. Í kjölfarið hafi hann lyft henni upp og látið hana hanga fram af svölunum.

• Blogga um frétt