Katrín prinsessa af Wales er ekki fyllilega búin að jafna sig segir ónefndur fjölskylduvinur í viðtali við People. Hún sýnir þó mikil batamerki og það er ljós fyrir enda ganganna.

„Það verður nokkur bið á því að hún snúi aftur til vinnu af krafti eins og hún var þekkt fyrir. Hún er nú að hlúa að sér og fjölskyldu sinni.“

Stutt er síðan teknir voru upp jólatónleikar Katrínar Together at Christmas sem sýndir eru á jóladag. Þangað mætti hún með eiginmanni og börnum og við það bundu margir vonir um að hún væri snúin aftur til starfa. Þetta var í fyrsta sinn síðan í júní sem öll fjölskyldan sást saman.

Hún ávarpaði tónleikagesti og sagði að fyrir ári síðan hefði hún aldrei getað ímyndað sér hvað árið 2024 ætti svo eftir að hafa í för með sér.

Á sama tíma fyrir ári síðan var hún að sinna börnunum og undirbúa jólin. Fáeinum vikum síðar gekk hún undir meiriháttar aðgerð á kvið og fékk í kjölfarið krabbameinsgreiningu.

Konunglegir sérfræðingar ráðleggja fólki að binda ekki miklar vonir við endurkomu prinsessunnar á næstunni. 

„Það er mikilvægt að ítreka að þetta er ekki spurning um einhvern kafla sem hægt er að klára og svo verður allt eðlilegt á ný. Krabbamein virkar ekki þannig. Það er tilgangslaust að reyna að fegra raunveruleikann þegar kemur að svo óútreiknanlegum sjúkdómi.“