Jólalög síðan í september

Dúettinn Ylja er kominn í jólaskap og ætla þær stöllur að skemmta fólki í Sjálandi í næstu viku. 

Hvað ætlið þið að bjóða upp á á ­jólatónleikunum ykkar?

Við verðum með fjölbreyttan lagalista; allt frá íslenskum þjóðalagajólaperlum yfir í amerískar krúsidúllur og klassík. Kvöldið verður ljúft og notalegt en líka mikil stemning og stuð og oft taka tónleikagestir undir með söng. Ég lofa sannarlega jólastemningu og skemmtilegheitum á Sjálandi.

Eruð þið Bjartey mikið að koma fram?

Hljómsveitin Ylja er alltaf að, þó vinnan komi í skorpum. Það er mikill fjölbreytni í því sem við gerum, við komum fram á alls kyns viðburðum, í brúðkaupum og jarðarförum, fyrir ferðamenn og svo auðvitað á jólatónleikum. Við erum bara tvær með gítara þannig að það er auðvelt að stökkva í alls konar verkefni, oft á hinum ólíklegustu stöðum. Allt frá eldfjallagíg, íshelli og á sjó og allt þar á milli.

Ertu komin í jólaskap?

Já, núna. Við erum auðvitað búnar að æfa jólalög síðan í lok september en ég leyfi mér ekki að fara í jólaskap fyrr en desember er genginn í garð. Ég náði að komast í jólaskap eftir að ég skilaði BA-ritgerðinni fyrir viku.

Áttu þér uppáhaldsjólalag?

Já, ég held að það sé Leppalúði með Ladda. Það er eitt af þessum þjóðlegu lögum sem við tökum og er bæði fallegt og hnyttið. Í fyrra gáfum við út okkar útgáfu af Dansaðu vindur og það mun líka hljóma á tónleikunum. Stefnan er svo að henda mögulega í eitt stykki jólaplötu á næsta ári. Þó fyrr hefði verið, jólabörnin sem við erum.

Bjartey Sveinsdóttir og Gígja Skjaldardóttir skipa dúettinn Ylju. Fimmtudaginn 19. desember verða þær með jólatónleika í Sjálandi í Garðabæ. Miðar fást á tix.is.