Átti draumadag á Anfield

Tveir leikmenn enska knattspyrnufélagsins Liverpool, þeir Virgil van Dijk og Mo Salah, komu ungum aðdáanda liðsins heldur betur á óvart nýverið.

Félagarnir heimsóttu hinn sex ára gamla Isaac Kearney í skólann skömmu fyrir jól og buðu honum í heimsókn á Anfield-leikvanginn þar sem hann fékk tækifæri til að heilsa upp á fleiri leikmenn og spjalla við knattspyrnustjóra Liverpool, Arne Slot.

Kearney, sem hefur glímt við erfðasjúkdóm frá fæðingu, eyddi deginum á vellinum, fylgdist með liðsæfingu og fékk að leiða van Dijk inn á völlinn þegar Liverpool spilaði gegn Manchester City í desember. Hann horfði svo á leikinn ásamt föður sínum og móður úr áhorfendastúkunni og lét vel í sér heyra þegar stuðningsmannalag Liverpool, You´ll Never Walk Alone, hljómaði í hátölurunum.

Myndband af þessari óvæntu heimsókn hefur farið eins og eldur í sinu um netheima og notið mikilla vinsælda en tæplega tvær milljónir manna hafa horft á myndbandið á Youtube-síðu liðsins á einni viku. 

• 1 blogg um fréttina

Bloggað um fréttina

• Jóhann Elíasson: SVONA FRÉTTIR GEFA LÍFINU GILDI..........