Keppir ekki um Ungfrú alheim sakir æsku sinnar

Sakir æsku sinnar mun Ungfrú Curacao ekki taka þátt í keppni um Ungfrú alheim sem fram fer á þessu ári. Í stað þess hefur hún hafið málaferli gegn aðstandendum keppninnar á Curacao.

Jozaine Wall, sem er sautján ára, mætti fyrir rétti í Willemstad í gær í máli sínu gegn samtökunum sem skipuleggja fegurðarsamkeppnina í heimalandi hennar. Þátttakendur í keppninni um Ungfrú alheim verða að vera orðnir átján ára í febrúar á þessu ári til að geta tekið þátt í keppninni sem fram fer í maí á Kýpur. Skipuleggjendur uppgötvuðu ekki vandann fyrr en í miðjum síðasta mánuði að sögn lögfræðings Wall, Gelmer Pieter. Samtökin buðu henni að taka þátt í keppninni um Ungfrú heim í London í staðinn en Wall neitaði. Hún vill að skipuleggjendurnir fresti þátttöku hennar fram til næsta árs eða greiði henni sem samsvarar 1,5 milljónum íslenskra króna fyrir útgjöld sín sem fegurðardrottning. Innifalið í kostnaðinum er eitt ár sem hún missti úr menntaskóla, fegrunarnámskeið í Kólumbíu, undirbúningur fyrir keppnina Ungfrú alheimur og lagalegur kostnaður. Búist er við dómsúrskurði í næstu viku.