Jólageitin sleppur við skemmdarverk

Forverar hennar hafa verið brenndir með kveikjurum, eknir um koll og skotið hefur verið á þá flugeldum. En risavaxna jólageitin sem búin var til úr stráum og komið upp í Gävle í Svíþjóð fyrir jólin hefur sloppið við skemmdarverk og er það í fyrsta skiptið í fimm ár sem það gerist.

Kaupmenn í Gävle tóku geitina niður í gær, nokkrum dögum fyrr en ráðgert hafði verið til að forðast frekari kostnað við öryggisgæslu.

Fyrsta jólageitin var sett upp í Gävle, sem er um 150 km norður af Stokkhólmi, árið 1966 af kaupmönnum þar í bæ. Síðan þá hafa einungis tíu geitur lifað af jól og áramót. Flestar hafa verið brenndar, sumar einungis nokkrum klukkustundum eftir að þeim var komið upp í fyrstu vikunni í desember.

Jólageitin 1976 varð fyrir bíl. Árið 1997 hlaut jólageitin skemmdir vegna flugelda og kveikt var í jólageitunum árin 1998 og 2001.

• Blogga um frétt