Kenndi hundinum sínum að heilsa með nasistakveðju

Þýsk stjórnvöld hafa fallið frá ákæru á hendur Þjóðverja nokkrum, sem sakaður var um að ýta undir nasistadýrkun með því að kenna hundi sínum að lyfta hægri loppunni að hætti þýskra nasista.

Maðurinn, sem nefndur er Ronald T. og er 54 ára, átti að koma fyrir rétt á morgun fyrir að kenna Adolf, fjárhundinum sínum, að heilsa að nasistasið.

Talsmaður þýska dómsmálaráðuneytisins sagði, að ákæran hefði verið felld niður vegna þess að ekki væri ljóst að maðurinn hefði brotið lög með þessu háttalagi. Talsmaðurinn sagði hins vegar að maðurinn ætti yfir höfði sér kærur fyrir ýmislegt annað hátterni, m.a. notkun á nasistatáknum.

Roland T., sem býr í Lichtenrade í suðurhluta Berlínar, sætir m.a. ákæru fyrir að klæðast skyrtubol með mynd af Adolf Hitler og fyrir að hafa kallað nasistaslagorð við ýmis tækiæri. Slík slagorð og kveðjur eru ólögleg í Þýskalandi þar sem valdatími nasista er enn mjög viðkvæmt mál.

• Blogga um frétt