Didgeridoo er ekki fyrir stelpur

Leiðtogar frumbyggja í Ástralíu hafa kallað eftir því að hætt verði við útgáfu bókar þar sem stúlkum er kennt að leika á hljóðfærið didgeridoo. Stefnt er að útgáfu áströlsku útgáfu bókarinnar Daring Book for Girls í næsta mánuði.

Frumbyggjaleiðtogarnir eru ósáttir við bókina vegna þess að þeir eru á þeirri skoðun að didgeridoo sé hljóðfæri karlmanna og að konur eigi ekki að leika á það.

Forsvarsmenn bókaútgáfunnar Harper Collins í Ástralíu segja að þeir hafi ekki vitað af því að þetta væri frumbyggjunum á móti skapi, og hafa beðið þá afsökunar.

Í bókinni er að finna hugmyndir að því hvernig fólk getur drepið tímann, og í áströlsku bókinni eru hugmyndirnar hugsaðar út frá því sem andfætlingarnir gætu haft áhuga á.

Mörg samfélög frumbyggja eru á þeirri skoðun að hljóðfærið, sem er einskonar viðarpípa sem er hol að innan, sé hátíðarhljóðfæri sem einvörðungu karlar eigi að leika á. Konum er því bannað að leika á hljóðfærið.

Sumir frumbyggjar trúa því jafnvel að það eitt að snerta hljóðfærið geti haft alvarlegar afleiðingar -  t.d. leitt til ófrjósemi.

• 4 blogg um fréttina

Bloggað um fréttina

• Markús frá Djúpalæk: Hér er meðal annars sungið um Diggeridoo
• Helga Guðrún Eiríksdóttir: Didgeridoo dododo
• Fjarki : Ekki fyrir stelpur!
• Brynjar Jóhannsson: Karlrembukjaftæði.