Gerum okkur dagamun

Reykjavíkurborg býður borgarbúum upp á fjölskyldudagskrá í dag, fyrsta vetrardag, undir yfirskriftinni „Gerum okkur dagamun“. Ókeypis aðgangur er  í Fjölskyldu- og húsdýragarðinn, sundlaugar, söfn og menningarstofnanir borgarinnar í dag. Víða verður boðið upp á skemmti- og fræðsludagskrá.

Borgarráð samþykkti á fundi sínum í vikunni að standa að fjölskyldudagskránni. Í greinargerð með tillögu um dagskrána er minnt á að yfirstandandi efnahagsþrengingar hafi áhrif jafnt á unga sem aldna. Reykjavíkurborg hafi þegar brugðist við þrengri efnahag með aðgerðaráætlunum og skipun sérstaks borgarteymis  vegna viðbragða og leiðsagnar við börn í borginni. Með fjölskyldudagskránni séu fjölskyldur í borginni hvattar til að eiga góðar stundir saman fyrsta vetrardag.

Af dagskrárliðum má nefna fjölskylduratleik á Landnámssýningunni í Aðalstræti kl. 15, ævintýraleiðsögn Snigils njósnadvergs úr Skilaboðaskjóðunni um sýningar í Listasafni Reykjavíkur, Hafnarhúsinu kl. 15:30, tónleika Englakórs Nataliu Chow á Kjarvalsstöðum kl. 15,  ókeypis ferjusiglingar út í Viðey kl. 13:15, 14:15 og 15:15, leikjadag í sundlaugum Reykjavíkur og Abba „skate-along” í Skautahöllinni í Laugardal.

Nánar um dagskrá

• 3 blogg um fréttina

Bloggað um fréttina

• Hólmdís Hjartardóttir: Mín tilgáta er sú
• Sigrún Jónsdóttir: Við gerðum okkur dagamun........í sitt hvoru lagi.
• Salvör Kristjana Gissurardóttir: Fyrsti vetrardagur