Sjö norskir bæir, sem römbuðu á barmi gjaldþrots vegna bandarískra undirmálslána, hafa höfðað mál gegn bandaríska bankanum Citigroup vegna misvísandi upplýsinga sem bankinn sendi frá sér. Segja sveitarfélögin að vegna þessa hafi þau tekið óþarfa áhættu í fjárfestingum.

Bæirnir sjö ásamt fasteignalánafyrirtækinu Terra Securites, sem nú er gjaldþrota, hafa gert kröfu á Citigroup upp á 200 milljónir Bandaríkjadala en lögsóknin er lögð fram í New York. Alls töpuðu sveitarfélögin 541 milljón norskra króna á fjárfestingunum, að því er fram kemur í frétt á vef Aftenposten.

Bæirnir, Bremanger, Hattfjelldal, Hemnes, Kvinesdal, Narvik, Rana og Vik, fjárfestu í alls konar skuldabréfavafningum sem tengdust bandaríska fasteignalánamarkaðnum en ástæðan var sú að bæjarstjórnir þeirra töldu að fjárfestingar þeirra skiluðu litlum arði á meðan önnur sveitarfélög væru að græða á tá og fingri í góðærinu.

En svo kom lánsfjárkreppan og virði undirmálslánanna þurrkaðist nánast út. Hins vegar var ákvæði í samningum sem bæirnir gerðu við Citigroup sem kvað á um að þeir héldu áfram að setja peninga í verkefnið.

Nánar á vef Aftenposten