Eigendur Haga stefna að því að gera Haga að skuldlausu félagi innan tveggja ára og endurfjármagna það síðan að nýju með þátttöku erlendra fjárfesta. Um er að ræða breska fagfjárfesta á sviði smásöluverslunar. Jón Ásgeir Jóhannesson staðfesti þetta í samtali við Morgunblaðið.

Þau félög sem mynda rekstur Haga eru m.a. Bónus, Hagkaup, 10-11, Útilíf og tískuverslanir eins og Zara, Debenhams, Topshop, Coast og Oasis, en um tvö þúsund manns vinna hjá samstæðunni.

Eins og Morgunblaðið greindi frá síðastliðinn laugardag mun Nýja Kaupþing hugsanlega taka yfir 95,7% eignarhlut í Högum, en Kaupþing fjármagnaði kaup 1998 ehf., sem er í eigu Jóns Ásgeirs og fjölskyldu, á Högum í júlí á síðasta ári fyrir þrjátíu milljarða króna gegn veði í 95,7% hlut og er lánið staðsett hjá Nýja Kaupþingi í dag.

Jón Ásgeir segir enga hættu á því að bankinn taki yfir rekstur Haga.

Fram hefur komið að lánið sé á einum gjalddaga á árinu 2010, en Jón Ásgeir segir það ekki rétt. Hann segir að fjármögnunin sé tvískipt til sex ára. Fyrri hlutinn sé á gjalddaga árið 2011 og sá síðari árið 2014. „Félagið mun standa við sínar skuldbindingar,“ segir hann. Samkvæmt upplýsingum Morgunblaðsins mun Nýja Kaupþing samt sem áður fylgjast áfram gaumgæfilega með rekstri Haga til að vernda hagsmuni sína.

Jón Ásgeir segir rekstur Haga ganga vel þrátt fyrir þrengingar í íslensku efnahagslífi. Það sé ekki aðeins matvöruhlutinn sem gangi vel heldur einnig sérvöruverslanir félagsins. „Fyrirtækið er á áætlun og gott betur. Sérvaran hefur gengið mjög vel, ekki síst vegna þess að verslunin hefur færst heim frá útlöndum,“ segir hann.