Lýður Guðmundsson, stjórnarformaður Exista og fyrrverandi stjórnarmaður í Kaupþingi, sagði í viðtali við Kastljós í kvöld að hann hefði ekki vitað að bankinn hafi lánað Mohamed bin Khalifa Al-Thani, bróður emírsins í Katar, fyrir kaupum á hlut í Kaupþingi. Lánið hafi ekki komið á borð stjórnar bankans.

Al-Thani keypti rúmlega 5% hlut í Kaupþingi í september á genginu 690 krónur á hlut. Þegar tilkynnt var um kaupin sagði Hreiðar Már Sigurðsson, þáverandi forstjóri Kaupþings, við Morgunblaðið að kaupin væru „mikil traustsyfirlýsing fyrir félagið.“

Fjármálaeftirlitið hefur undanfarna mánuði rannsakað kaupin og hvort um sýndarviðskipti hafi verið að ræða.