Júlía Rós Júlíusdóttir er mjög ánægð með að hafa þyngst um 1/2 kíló því hún segir að þetta séu bara vöðvar. Þetta 1/2 kíló segir ekki allt því á sama tíma hefur hún misst 4% af fitu og mittið er 8 sm grennra, mjaðmir 4 sm grennri, læri 3 sm grennri og upphaldleggir 1,5 sm grennri.

„Tölurnar segja auðvitað bara hálfa söguna. Við fórum einnig í armbeygju- og magaæfingapróf í vikunni sem kom rosa vel út hjá okkur öllum. Var að vísu varla staðinn upp úr ælupest en (já já ég veit engar afsakanir) en ég bætti mig um tvær armbeygjur, gat núna 42 - já á tánum, en ekki hvað? Uppsetur - ég gerði 46 og bætti um sex, þær voru teknar á tíma, við höfðum bara eina mínútu. Þetta ætti að segja það að ég er að fá aukinn styrk, ekki satt? Það er auðvitað mesti ávinningurinn af þessu öllu,“ segir Júlía á bloggi sínu.